Þóra Arnórsdóttir, ritstjóri Kveiks, er viðmælandi Þorsteins V. Einarssonar í nýjasta þætti hlaðvarpsins Karlmennskan. Þátturinn ber yfirskriftina „Hreinsunareldur sem brenndi þolendur“ með vísan í titil nýjasta þáttar Kveiks sem heitir „Hreinsunareldur Þóris Sæmundssonar.“

Þóra tók þar vægast samt umdeilt drottningarviðtal við Þóri sem var á sínum tíma rekinn úr Þjóðleikhúsinu eftir að hann varð uppvís af því að senda typpamyndir af sér. Í viðtalinu lýsti Þórir sér sjálfur sem fórnarlambi sem að ósekju fengi nú hvergi vinnu.

Þegar Þorsteinn spyr Þóru hvers vegna ákveðið hafi verið að gera einhliða illa ígrundaða og meingallaða umfjöllun um ofbeldi sem málaði hóp þolenda sem gerendur segir hún þau sannarlega hafa fengið miklar þakkir fyrir að opna á erfiða umræðu, en líka miklar skammir og að gagnrýnin sé að mörgu leyti réttmæt. „Ég get bara sagt að mér þykir þetta mjög leiðinlegt,“ segir hún og telur það til marks um að þau hafi ekki komið skilaboðum með þættinum nógu vel á framfæri.

Þeir hoppa ekki ofan í holu

Hún heldur síðan áfram og segir að fyrir fyrstu bylgju #metoo hafi frásagnir þolanda verið stakar og óljóst hvaða viðbrögð þolendur myndu fá við frásögnum sínum. Nú hafi unga kynslóðin, í krafti fjöldans, sýnst samstöðu og sagt „Hingað og ekki lengra.“ Þá bendir Þóra á að það sé hægt að vera gerandi á svo margan hátt án þess að brjóta lög, og það sé vert að skoða hvar þau mörk liggja.

Þá beinir hún sjónum að gerendum: „Þeir hverfa ekki þessir menn, þeir grafa ekki holu, hoppa ofan í hana og koma ekki aftur,“ og því sé mikilvægt að átta sig á þeirra stöðu sömuleiðis. Ef ekki er brotið gegn lögum er engin málsmeðferð.

„Þóra, þú ert ein af okkur. Hvað? Hvað, hvað?“

„Við erum búin að fá núna undanfarið, finnst mér, ákveðið bakslag í umræðunni. Og ég held að ástæðan fyrir því að ég hef ekki fengið meiri leiðindi yfir mig sé einfaldlega það að það eru þarna baráttukonur sem sögðu bara: „Þóra, þú ert ein af okkur. Hvað? Hvað, hvað?“ Og gáfu mér kannski einhvern slaka þess vegna, því það er alveg rétt, ég hef aldrei farið með launkofa með það. Ég er gallharður femínisti en það er líka mín ábyrgð þegar maður stýrir svona miðli að horfa á heildarmyndina og það sem ég hef séð undanfarið er að þú ert með hóp í samfélaginu sem segir: „Þið þarna öfgafemínistar, þið viljið bara taka menn af lífi án dóms og laga“. Og á móti kemur: „Bíddu þið eruð stuðningsmenn nauðgunarmenningar“. Og hverju skilar þetta samfélaginu? Það er stóra spurningin,“ segir hún.

Í kjölfar þáttarins hafa þolendur stigið fram í hrönnum, einkum á Twitter, og lýst því hvernig þátturinn hafi verið eins og „hlandblaut tuska í andlitið á þolendum“. Raunar var það ung kona sem tók svo til orða og lýsti því á Twitter og í samtali við Stundina, að viðmælandi Kveiks hefði notfært sér aldur hennar til að sofa hjá sér, þegar hún var 16 ára og hann 34 ára. Og hún virðist ekki vera sú eina sem svíður undan viðmælanda Kveiks. En umfjöllun Kveiks var ekki um þjáningarnar sem viðmælandinn hefði ollið þolendum sínum og hvernig hann hefði axlað á þeim ábyrgð, heldur hvort að afleiðingarnar sem hann hefur mátt mæta vegna gjörða sinna „væri sanngjörn niðurstaða“

@karlmennskan með áhugaverðan þátt þar sem @idnadarmadurinn stóð sig mjög vel 👏🏼 en @ThoraArnors olli mér miklum vonbrigðum fyrir hönd @ruvkveikur. Held að við öll sem femínistar erum sammála um að fólk þarf möguleika á að koma til baka inn í samfélagið eftir að hafa runnið á…1/

— Brynhildar saga Valkyrju (@BrynhildurYrsa) November 8, 2021

@ Þóra Arnars pic.twitter.com/V8zUj74Moy

— 🇵🇸 Tinna, öfgafemínisti 💥 (@tinnaharalds) November 8, 2021