Mannlíf greindi frá því í október að hestaíþróttamaðurinn Jóhann Rúnar Skúlason hafi verið dæmdur bæði fyrir heimilisofbeldi og nauðgun á 13 ára stúlku. Í fréttum Mannlífs af málunum var því haldið fram að Jóhann hafi verið sakfelldur fyrir nauðgunina en Jóhann segir það ekki vera satt í yfirlýsingu sem hann hefur sent frá sér vegna fréttaflutningsins. Yfirlýsingin var birt á Hestafréttum.
„Það er rangt sem fram kemur í frétt Mannlífs að ég hafi með dómi Héraðsdóms Norðurlands vestra verið sakfelldur fyrir nauðgun. Þvert á móti þá var ég sýknaður af nauðgun,“ segir Jóhann í yfirlýsingunni. „Það er líka rangt sem segir í fréttinni að ég hafi vitað hvað stúlkan var gömul. Hins vegar taldi dómurinn að ég hafi sýnt af mér stórfellt gáleysi um aldur stúlkunnar og því var ég sakfelldur fyrir brot gegn 1. mgr. 202. gr. laga nr. 19/1940 og dæmdur í 4 mánaða fangelsi þar sem 3 mánuðir voru skilorðsbundnir.“
Í frétt Mannlífs var tekið fram að Jóhann hafi verið með ökklaband vegna heimilisofbeldisins, Jóhann segir það ekki hafa verið rétt. „Hvað varðar hin danska dóm frá 2016 þá er það rangt sem fram kemur í frétt Mannlífs að ég hafi verið með öklaband. Hið rétta er að ég var dæmdur í 40 daga skilorðsbundið fangelsi og var skilorðið fólgið í því að ef ég gerðist ekki sekur um refsiverða háttsemi í 1 ár og sinnti samfélagsþjónustu í 60 klukkustundir þá kæmi dómurinn ekki til afplánunar. Ég stóð við þessi skilyrði. Því máli var því lokið 2017.“
Að lokum segir Jóhann í yfirlýsingunni að hann iðrist gjörða sinna og svo biðst hann afsökunar. „Ég get ekki breytt því liðna. Ég iðrast hins vegar gjörða minna og bið brotaþola í ofangreindum málum afsökunar.“
