David Erik Mollberg hefur verið ráðinn sérfræðingur í máltækni og vöruþróun hjá máltæknifyrirtækinu Tiro ehf. Þetta kemur fram í fréttatilkynningu.

David lauk nýlega meistaranámi í máltækni frá Háskólanum í Reykjavík og lokaverkefni hans snéri að því að sníða talgreini sem gat ráðið við orð sem komu ekki fyrir í þjálfunargögnum.

Samhliða námi stundaði hann rannsóknarstörf innan Mál- og raddtæknistofu gervigreindarseturs HR og leiddi þar þróun og söfnun gagna í gengum Samrómur.is þar sem allir íslenskumælandi voru hvattir til að leggja rödd sína að mörkum.

Í fréttatilkynningu segir:

„Í starfi sínu innan Tiro mun David styrkja teymið sem sinnir þróun talgreina til að efla og auka notkunarmöguleika þeirra sem eru nú þegar til staðar innan fyrirtækisins. David mun jafnframt sinna mikilvægu hlutverki í vöruþróun á sviði talgreiningar og talgervingar. 

„Það liggja mikil tækifæri fyrir fólk og fyrirtæki til að bæta líf sitt og störf með tilkomu máltæknilausna sem skilja íslensku. Það er því afskaplega spennandi að starfa á þessu sviði um þessar mundir.“

Tiro er ört vaxandi fyrirtæki sem hefur unnið að máltæknilausnum, sérstaklega á svið talgreiningar frá árinu 2014. Stefna fyrirtækisins er að vera leiðandi á svið taltækni fyrir íslensku. Fyrirtækið hefur byggt upp einn öflugasta talgreini fyrir íslensku sem þróaður hefur verið og stefnir ótrautt að því að útfæra lausnir byggðar á honum fyrir íslensku í stafrænu umhverfi.“