Norska lögreglan vinnur enn að rannsókn á hvarfi Anne-Elisabeth Hagen en hún hvarf frá heimili sínu í útjaðri Osló fyrir tæpum þremur árum en á sunnudaginn verða nákvæmlega þrjú ár liðin frá því að hún hvarf.

En nú hefur lögreglan dregið úr kraftinum á rannsókninni og þar með kostnaðinum við hana. Allt frá upphafi hefur lögreglan lagt mikla vinnu í rannsóknina en það hefur ekki skilað miklum árangri varðandi lausn málsins.

Lögreglan vinnur aðallega út frá þeirri kenningu að Tom Hagen, eiginmaður Anne-Elisabeth, hafi verið viðriðinn hvarf hennar og hefur hann stöðu grunaðs í málinu.

Lögreglan telur fullvíst að Anne-Elisabeth sé látin.

Á þeim tæpu þremur árum sem eru liðin frá hvarfi Anne-Elisabeth hefur lögreglan farið 27 milljónir norskra króna fram úr fjárframlögum sínum vegna rannsóknarinnar.

En nú verður hægt á og dregið úr útgjöldunum. Fram að þessu hafa 20-30 lögreglumenn unnið að rannsókninni og ráðgjöf hefur verið keypt frá utanaðkomandi ráðgjöfum. En nú verður því hætt og dregið úr yfirvinnu.

Þetta þýðir ekki að rannsókninni verði hætt en hún verður nú sett í ódýrari farveg. Þetta er að sögn afleiðing af því að rannsóknin er komin á nýtt stig sem er mun markvissara en í upphafi. Dagbladet skýrir frá þessu.