Langt inni í hjarta Vetrarbrautarinnar okkar er eitthvað undarlegt á seyði. Stjörnufræðingar hafa numið óvenjuleg útvarpsmerki sem berast þaðan. Þær fylgja engu mynstri sem við þekkjum og því grunar stjörnufræðinga að uppruna þeirra megi rekja til einhvers sem við höfum aldrei séð eða heyrt í áður.

Þeir telja að hér sé um eitthvað nýtt stjarnfræðilegt fyrirbæri að ræða. Þetta kemur fram í fréttatilkynningu frá University of Sydney.

„Við höfum aldrei séð neitt þessu líkt,“ segir doktorsneminn Ziteng Wang, sem stendur á bak við nýja rannsókn um þetta fyrirbæri sem hefur fengið hið óþjála nafn ASKAP J173608.2-321635 en það eru hnit þess á himninum.

Hvað sem þetta er þá hegðar það sér á áður óþekktan hátt og sendir frá sér undarleg merki. Vísindamennirnir benda á háa skautun fyrirbærisins og að það sendi frá sér útvarpsbylgjur sem eru misöflugar. „Merkið kviknar og slökknar á algjörlega tilviljanakenndum tímapunktum,“ segir Wang.

Þetta fyrirbæri uppgötvaðist með útvarpssjónaukanum CSIRO‘s ASKAP í vesturhluta Ástralíu. Tilvist þess var síðan staðfest með MeerKAT útvarpssjónaukanum sem er í Suður-Afríku.

Niðurstöður rannsóknarinnar hafa verið birtar í vísindaritinu The Astrophysical Journal.