The Verge skýrir frá þessu og hefur eftir ónafngreindum heimildarmönnum. Talsmenn Facebook sögðu í gær að fyrirtækið vilji ekki tjá sig um „orðróm eða getgátur“.
Fréttin um nafnabreytinguna kemur á sama tíma og bandarísk yfirvöld hafa í auknum mæli beint sjónum sínum að Facebook og hvernig starfsemi samfélagsmiðilsins er háttað. Bæði Demókratar og Repúblikanar hafa sótt að fyrirtækinu sem þeir saka meðal annars um ólöglega einokunarstarfsemi.
Fyrirtækið hefur einnig verið sakað um leiða hjá sér neikvæð áhrif Instagram á fólk og þá sérstaklega ungar stúlkur. Segja má að vaxandi reiði hafi beinst að Facebook að undanförnu á bandaríska þinginu.
The Verge segir að einn liður í nafnabreytingunni verði að setja eins mikið af vörumerkjum fyrirtækisins og hægt er undir móðurfyrirtæki með öðru nafni. Miðillinn segir að nafnið eigi að endurspegla stórhuga áætlanir Facebook um að byggja upp svokallað „metaverse“ en þar verður fólk til staðar sem stafræn útgáfa af sjálfu sér. Miðillinn segir einni að þetta sé merki um ósk Facebook um að verða þekkt fyrir fleira en að vera bara samfélagsmiðill.
