Viðkomandi auglýsti nýlega herbergi til leigu í bænum North Manchester í Indiana í Bandaríkjunum en þetta er smábær. Auk þess að vilja fá sem svarar til um 170.000 íslenskra króna í leigu á mánuði þá setur hann verðandi leigjanda strangar umgengnisreglur.
Til dæmis má ekki horfa á sjónvarp eftir klukkan 21.30. Þess utan er algjört bann við því að kjöt komi inn í íbúðina því leigusalinn er grænmetisæta.
Auglýsingin hljóðar eitthvað á þessa leið: „Ég er með herbergi til leigu í íbúðinni minni sem er þriggja herbergja. Leigan er fyrir eitt herbergi! Þú færð aðgang að baðherberginu en mátt ekki fara í sturtu eftir klukkan 20! Þú mátt nota eldhúsið mitt en þú verður að þrífa eftir þig. Þú verður að sjá þér fyrir klósettpappír, sápu og sjampói. Þú verður að kaupa þinn eigin mat!“
Að auki tekur hann fram að ekki megi horfa á sjónvarp eftir klukkan 21.30, ekki má hlusta á tónlist á kvöldin og ef leigjandinn vill fá aðgang að þráðlausu neti þarf hann að greiða sem nemur um 10.000 íslenskum krónum á mánuði fyrir það.
Í auglýsingunni stendur einnig: „Herbergið verður skoðað vikulega til að tryggja að þú sinnir þrifum.“
Það er algengt að leigjendum sé bannað að vera með gæludýr en þessi leigusali gengur enn lengra og bannar verðandi leigjanda eiginlega að fá gesti. „Ef þú færð heimsókn þá verða gestirnir að vera inni í herberginu þínu allan tímann! Þeir mega ekki nota klósettið, þetta er húsið mitt – ekki þitt. Þú verður að fara eftir öllum reglunum!“
