Ejub Purisevic er efstur á blaði hjá Grindavík yfir þá sem félagið vill fá til að þjálfa meistaraflokk karla hjá sér. Þetta sagði Kristján Óli Sigurðsson í hlaðvarpsþættinum Dr. Football í dag.
Ejub er þekktastur fyrir starf sitt sem þjálfari Víkings Ólafsvíkur þar sem hann náði mögnuðum árangri.
Hann hefur undanfarið starfað við það að þjálfa yngri flokka Stjörnunnar. Þá var hann aðstoðarþjálfari Þorvalds Örlygssonar hjá meistaraflokki karla hjá félaginu í sumar.
Sigurbörn Hreiðarsson hefur stýrt liði Grindavíkur í Lengjudeildinni undanfarin tvö ár. Hann verður ekki áfram með liðið.
Grindavík hafnaði í sjöunda sæti Lengjudeildarinnar á nýafstaðinni leiktíð.
