Indverska lögreglan lagði nýlega hald á þrjú tonn af heróíni frá Afganistan. Tveir Indverjar voru handteknir vegna málsins. Söluverðmæti heróínsins er talið vera sem nemur um 350 milljörðum íslenskra króna.

The Guardian segir að heróínið hafi verið geymt í tveimur gámum á Mundra hafnarsvæðinu í vesturhluta Indlands. Samkvæmt farmskrá átti að vera talk í gámunum.

Í öðrum gámnum voru tæplega tvö tonn af heróíni og í hinum tæplega 1 tonn. Heróínið er frá Afganistan en hafði komið til Indlands í gegnum Íran.

Rannsókn málsins hefur leitt í ljós að nokkrir Afganar tengjast því en þeir hafa ekki verið handteknir.

Afganistan er stærsti framleiðandi heróíns í heiminum en 80-90% af heimsframleiðslunni koma þaðan. Heróínframleiðsla hefur aukist mjög þar í landi á síðustu árum og hafa Talibanar notið góðs af og geta nýtt sér ágóðann til að fjármagna baráttu sína.