PSG staðfesti í dag að Lionel Messi væri að glíma við hnémeiðsli eftir að framherjinn var tekinn af velli í leik liðsins gegn Lyon um síðustu helgi.

Messi virtist ósáttur við að vera tekinn af velli þegar að 15 mínútur voru eftir af venjulegum leiktíma og Mauricio Pochettino, þjálfari liðsins, var mikið gagnrýndur fyrir skiptinguna.

Mauro Icardi tókst að réttlæta ákvörðun þjálfarans þegar hann skoraði sigurmark Parísarliðsins í uppbótartíma og PSG hefur nú unnið sex leiki af sex í frönsku úrvalsdeildinni í ár.

Pochettino sagði eftir leik að hann hefði tekið Messi út af til að passa upp á að hann meiddist ekki alvarlega. Ljóst er að Argentínumaðurinn verður ekki með gegn Metz um næstu helgi en óljóst er hvort hann verði klár í slaginn gegn Man City í Meistaradeildinni í næstu viku.

„Félagið hefur tjáð sig um Messi, staðan er ljós,“ sagði Pochettino á þriðjudag. „Við vorum ánægðir með Messi á sunnudag en sáum að hann kom við hnéð á sér, hann lék 75 mínútur sem er ánægjulegt.“