Tæknirisinn Apple vinnur nú að þróun nýrrar tækni til að hlaða farsíma sem gerir það að verkum að hleðslusnúrur verða með öllu óþarfar. Mun þá duga að leggja símann frá sér í ákveðnum radíus frá hleðslumiðstöð sem hleður tækið þráðlaust.

Að því er Bloomberg greinir frá gæti þessi tækni litið dagsins ljós fljótlega, jafnvel á næsta ári. Þráðlaus hleðslubúnaður er ekki með öllu óþekktur en til eru svokallaðar hleðslumottur sem hlaða símtæki þráðlaust. Þá dugar að leggja símann, eða tækið, ofan á mottuna en tæknin sem Apple vinnur að þróun á gerir það að verkum að hægt er að hlaða símann í nokkurri fjarlægð frá hleðslumiðstöðinni.

„Það sem Apple vinnur að er meðal annars hvernig hægt er yfirstíga þær hindranir sem hingað til hafa verið, til dæmis varðandi tap á orku þegar hún er flutt milli staða,“ segir heimildarmaður innan raða Apple við Bloomberg.

Þetta er ekki eina nýjungin sem Apple vinnur að þróun á því eins og greint hefur verið frá er jafnvel búist við því að engin innstunga fyrir heyrnartól verði á iPhone-7 símanum. Með því móti verður hægt að gera símann enn þynnri. Þá er orðrómur á kreiki um að Apple muni kynna nýja tækni, Li-Fi, sem myndi koma í stað þráðlausa netsins sem í daglegu tali gengur undir nafninu Wi-Fi. Wi-Fi notast við útvarpsbylgjur en Li-FI notar sýnilegt ljós (e. Visible Light Communication) og er um hundrað sinnum hraðara en Wi-FI. Auk þess að vera hraðara er Li-Fi tæknin talin margfalt öruggari.