Fréttablaðið skýrir frá þessu. Fram kemur að Andri Gunnarsson, verkfræðingur og teymisstjóri vatnafars hjá Landsvirkjun hafi staðfest þetta en hann hefur fylgst með vatnsbúskap landsins í rúman áratug.
Haft er eftir honum að vorið og sumarið hafi verið sérstakt að því leyti að lífseig hæð yfir Grænlandi í maí og júní hafi haldið köldu veðri yfir landinu í langan tíma og hafi leysingar því verið með minnsta móti. Í júlí og ágúst hafi staðan breyst en þá hlýnaði og jöklar fóru að bráðna hraðar.
Haft er eftir honum að umskiptin hafi verið svo mikil að Blöndulón, Hágöngur og Hálslón, sem eru helstu miðlunarlón landsins, hafi fyllst á réttum tíma síðsumars en í vor leit út fyrir að það myndi ekki gerast.
Lítil úrkoma frá síðasta hausti og fram á vor hafði í för með sér að afkoma grunnvatnsstýrðra vatnsfalla hefur verið lítil og það þýðir að Þórisvatn, sem er stærsta miðlunarlón Landsvirkjunar að flatarmáli, hefur staðið óvenjulega lágt. „Grunnrennslið hefur verið svo lítið í heilt ár að það stóra vatn hefur sjaldan verið vatnsminna – og ef fram heldur sem horfir, með hlýju hausti, má búast við að það slái met,“ er haft eftir Andra.
