Tveimur leikjum er nýlokið í 19. umferð Pepsi Max-deildar karla.
Fylkir 0-7 Breiðablik
Breiðablik heimsótti Fylki og gjörsamlega valtaði yfir heimamenn.
Kristinn Steindórsson og Höskuldur Gunnlaugsson voru búnir að koma gestunum í 0-2 eftir um 20 mínútur.
Viktor Karl Einarsson bætti við þriðja markinu á 36. mínútu og um fimm mínútum síðar gerði Ólafur Kristófer Helgason í marki Fylkis sjálfsmark.
Staðan í hálfleik var 0-4.
Fimmta mark Blika lét bíða eftir sér þar til 20 mínútur lifðu leiks. Það skoraði Höskuldur. Stuttu síðar skoraði Davíð Örn Atlason sjötta mark gestanna frá Kópavogi.
Árni Vilhjálmsson skoraði svo síðasta mark leiksins á 85. mínútu. 0-7 sigur Blika staðreynd!
Breiðablik er komið aftur á toppinn í deildinni. Liðið hefur 41 stig, 2 stigum meira en Víkingur sem er í öðru sæti. Fylkir er komið í fallsætimeð 16 stig.
HK 1-0 Keflavík
HK er komið upp úr fallsæti eftir mjög svo mikilvægan sigur á Keflavík.
Marley Blair, leikmaður Keflavíkur, fékk rautt spjald á 22. mínútu leiksins fyrir að slá að Ásgeiri Berki Ásgeirssyni.
Stefan Alexander Ljubicic gerði svo eina mark leiksins fyrir HK á 74. mínútu. Lokatölur 1-0.
HK er nú í tíunda sæti deildarinnar með 17 stig, stigi meira en Fylkir sem er í fallsæti. Keflavík er sæti ofar með stigi meira.
