Það hefur varla farið framhjá mörgum að samband bræðranna William og Harry, Bretaprinsa, hefur verið ansi stirt síðustu misseri. Að sögn erlendra fjölmiðla hefur samband þeirra verið svo stirt að þeir töluðust varla við en þeir voru alltaf nánir hér á árum áður.

Harry viðurkenndi í viðtali fyrir tveimur árum að samband þeirra bræðra væri ekki gott. Margir hafa viljað kenna eiginkonu Harry, Meghan Markle, um það og segja hana vera einhverskonar spellvirkja sem hafi eyðilagt samband bræðranna.

Þegar Harry og Meghan ákváðu að segja skilið við konungshöllina og störf sín fyrir hana, hið svokallaða Megxit, sendi höllin frá sér yfirlýsingu um að William og eiginkona hans, Kate Middleton, ættu enga sök á þessari ákvörðun Harry og Meghan.

Síðar kom fram að það hafi ekki verið til að bæta stöðuna að daginn fyrir brúðkaup Harry og Meghan sinnaðist henni við Kate og var deiluefnið háalvarlegt mál um hvernig sokkabuxum kornungar brúðarmeyjar ættu að klæðast.

Ekki batnað sambandið fyrr á þessu ári þegar Harry og Meghan komu fram í spjallþætti bandarísku spjallþáttadrottningarinnar Oprah Winfrey og sögðu sögu sína af viðskilnaðinum við konungshöllina.

En nú eru kannski bjartari tímar framundan hjá bræðrunum. Að minnsta kosti ef marka má orð Stewart Pearce sem er að sögn sérfræðingur í málefnum bresku konungsfjölskyldunnar. Hann segir að svo virðist sem William, Harry, Kate og Meghan hafi nú náð saman á nýjan leik. Us Weekly skýrir frá þessu.

„Ég veit að þau fjögur tala saman og að þau tala saman í gegnum Zoom og FaceTime,“ er haft eftir Price sem skrifaði bókin „Diana: The Voice of Change“.

Hann sagði að hjónin væru mjög náin þrátt fyrir að vera „mjög ólík“. „Heimssýn þeirra er mjög einstaklingsbundin og það er ótrúlegt að þau virða hvert annað,“ sagði hann.

Að sögn heimildarmanna fór að rofa til í samskiptum hjónanna eftir að dóttir Harry og Meghan, Lillibet, fæddist. Kate er sögð hafa sent margar kveðjur og gjafir til Lillibet og Meghan til að reyna að koma vináttunni í lag á nýjan leik.