Samkvæmt stundatöflu hefst kennsla í Fossvogsskóla í dag. Síðastliðinn föstudag fengu foreldrar barna í 2. til 4. bekk senda skoðanakönnun þar sem þeir voru beðnir um að kjósa um tilhögun skólahalds næstu vikur. Misbrestur var á framkvæmd könnunarinnar að mati foreldra barna í skólanum.

Morgunblaðið skýrir frá þessu í dag. Eins og kunnugt er fannst mygla í húsnæði Fossvogsskóla árið 2017 og hefur mikil röskun orðið á skólastarfi vegna framkvæmda sem enn standa yfir en reynt er að komast fyrir mygluna.

Morgunblaðið segir að í skoðanakönnuninni hafi foreldrum barna í 2. til 4. bekk og starfsfólki verið boðið að velja á milli þriggja valkosta fyrir tilhögun skólastarfs fyrstu vikurnar á skólaárinu. Fulltrúar foreldra barna í skólanum telja að könnunin hafi borist seint en hún var send út á föstudaginn og var fólk beðið um svör innan sólarhrings. „Þessi könnun var ekki gerð í samráði við fulltrúa foreldra né starfsfólks skólans heldur var hún bara keyrð í gegn og fólki ekki gefið neitt svigrúm til að bregðast við henni,“ er haft eftir Karli Óskari Þráinssyni, formanni foreldrafélags Fossvogsskóla. Að auki hafi ekki verið skýrt frá kostum og göllum þeirra kosta sem voru í boði og gerði það svarendum enn erfiðara fyrir við að taka upplýsta ákvörðun. Þess utan voru engar upplýsingar um persónuvernd á íslensku í könnuninni og engin krafa var gerð um lágmarksþátttöku.

Morgunblaðið segir að það sem hafi veri mest gagnrýnt við könnunina sé að hún hafi verið öllum opin.

Á laugardaginn sendi borgin frá sér tilkynningu þar sem fram kemur að mikil þátttaka hafi verið í könnuninni og að niðurstaðan hafi verið skýr. En engar nánari upplýsingar fylgdu með um hve margir hafi svarað.

Morgunblaðið hefur eftir Karli Óskari að niðurstöður könnunarinnar hafi sem betur fer verið í samræmi við þá skoðun sem fulltrúar foreldra og starfsfólk skólans lét í ljós á skólaráðsfundi síðasta fimmtudag um að skólastarf 2. til 4. bekkjar skuli fara fram í nýju húsnæði Hjálpræðishersins við Suðurlandsbraut.

Karl sagði vinnubrögð borgarinnar í málinu ekki vera upp á marga fiska og að misbrestur á framkvæmd könnunarinnar hafi ekki komið fólki á óvart. „Þetta er lýsandi fyrir það að samráð er valkvætt í huga borgaryfirvalda og hvernig þau reyna komast hjá því þar til þau eru komin upp að vegg,“ er haft eftir honum. Hann benti jafnframt á að engin leið sé að vita hvenær færanlegar kennslustofur verða teknar í gagnið og sagðist hann efast um að það verði fyrir miðjan september.