Af mikilli innlifun sagði hann frá því að hann hefði húkkað sér far með manni sem ók síðan á vegavinnumann og réðst síðan á konu. Kai sagði frá þessu öllu með miklum tilburðum og lýsti því hvernig hann hefði stormað fram til að bjarga konunni og hefði lamið árásarmanninn í hnakkann með öxi.
Viðtalið var síðan birt á YouTube og milljónir manna hafa horft á það. Margir höfðu samúð með Kai sem var heimilislaus og sagðist ekki vita hversu gamall hann væri og að hann ætti enga fjölskyldu. Hann var fenginn í viðtal hjá spjallþáttastjórnandanum Jimmy Kimmel og í fjölda annarra fjölmiðla. Kimmel sagði að Kai væri svo mikið góðmenni að hann ætti að sækja um starf sem páfi!
En hetjuljóminn féll fljótlega í skuggann fyrir morðákæru. Aðeins þremur mánuðum síðar komst Kai, sem var þekktur á samfélagsmiðlum sem „Puttalingurinn með öxina“, aftur í fréttirnar en nú fyrir morð. Hann var þá handtekinn, grunaður um að hafa myrt Joseph Galfy, 73 ára lögmann, í New Jersey.
Þeir hittust á Times Square í New York. Galfy bauð Kai að gista heima hjá sér. Tveimur dögum síðar var Galfy látinn og skömmu síðar var Kai handtekinn.
Galfy var rifbeinsbrotinn, höfuðkúpubrotin og með fjölda annarra áverka að sögn lögreglunnar. Kai sagðist hafa veitt honum þessa áverka í sjálfsvörn þegar Galfy ætlaði að beita hann kynferðislegu ofbeldi. Þessari frásögn var ekki trúað og Kai var dæmdur í 57 ára fangelsi 2019. Hann hefur síðan barist fyrir frelsi sínu en í síðustu viku tapaði hann áfrýjun í málinu og sér því fram á að eyða næstu áratugum bak við lás og slá.
