Sem svarar til um einum milljarði íslenskra króna átti Rachel Uchitel að fá inn á reikning sinn ef hún héldi ástarsambandi sínu við golfstjörnuna Tiger Woods leyndu. En hún fékk aldrei alla upphæðina inn á reikninginn sinn því ýmis kostnaður féll til sem saxaði vel á upphæðina, þar á meðal lögmannskostnaður og skattar.

Uchitel, sem er 46 ára, segist aðeins hafa fengið sem nemur um 260 milljónum íslenskra króna. New York Post skýrir frá þessu.

Nú hefur bæst við hremmingar hennar því lögmenn Woods eru nú á eftir henni því hún braut samning þeirra frá 2009 um að halda sambandinu leyndu en hann er upp á 30 síður. Samkvæmt samningnum mátti hún ekki tala um hvað Woods vildi í kynlífinu, líkamlegt ástand hans, lífsstíl og margt fleira. Þetta mátti hún ekki ræða við neinn og gilti þá einu hvort um ættingja hennar var að ræða eða blaðamenn. Hún mátti heldur ekki ræða um samninginn.

En hún ræddi um samband sitt við Woods í heimildarmyndinni „Tiger“ sem HBO gerði 2019. Af þessum sökum vilja lögmenn Woods nú að hún endurgreiði sem nemur um 640 milljónum íslenskra króna.

New York Post segir að samkvæmt því sem Uchitel segi þá hafi samband hennar við Woods fyrir rúmum 10 árum enn áhrif á efnahag hennar, frama, andlegt heilbrigði og ástarlífið.

Hneykslið varðandi framhjáhald Woods kom upp á yfirborðið 2009 þegar hann lenti í umferðaróhappi nærri heimili sínu. Fljótlega eftir það skildi eiginkona hans, hin sænska Elin Nordegren, við hann en þau eiga tvö börn saman.