Niðurstöður nýrrar rannsóknar sýna að fá börn veikjast alvarlega af COVID-19 í kjölfar kórónuveirusmits. Það sama á við um langtímaáhrif smits, þau eru sjaldgæf hjá börnum. Algeng einkenni hjá börnum eru höfuðverkur og þreyta. Tvö af hverjum þremur börnum fá engin sjúkdómseinkenni.

Það voru vísindamenn við Kings College London sem gerðu rannsóknina en hún hefur verið birt í læknaritinu The Lancet.

Rúmlega 200.000 börn, smituð af kórónuveirunni og ekki, tóku þátt í rannsókninni. Tvö af hverjum þremur, sem greindust með veiruna, fengu engin sjúkdómseinkenni. 1.734 börn, sem greindust með veiruna og fengu sjúkdómseinkenni, voru tekin til sérstakrar rannsóknar. Þau eru á aldrinum 5 til 17 ára.

Helstu niðurstöðurnar voru að tæplega 1 af hverjum 20 var með sjúkdómseinkenni í meira en fjórar vikur. 1 af hverjum 50 var með einkenni í meira en átta vikur. Hjá þeim sem glímdu við langvarandi áhrif smits dró smám saman úr þeim. Flest börnin náðu sér á um sex dögum. Algengustu sjúkdómseinkennin voru höfuðverkur og þreyta. Sum eldri barnanna glímdu einnig við skert lyktar- og bragðskyn.

Í stuttu máli sagt þá sýna niðurstöður rannsóknarinnar að börn glíma sjaldan við langvarandi veikindi af völdum COVID-19. Veikindi barna eru yfirleitt skammvinn og einkennin eru væg. Sum börn glíma þó við sjúkdómseinkenni eftir að þau eru laus við smitið.