Tilvik hafa komið upp hér á landi þar sem fyrirtæki hafa beint þeim tilmælum til starfsfólks, sem kemur frá útlöndum, að það mæti ekki til vinnu fyrr en það hefur farið í sýnatöku vegna kórónuveirunnar. Lára V. Júlíusdóttir, hæstaréttarlögmaður og sérfræðingur í vinnurétti, telur að atvinnurekendum sé heimilt að krefjast þess að starfsfólk fari í sýnatöku en sama máli gegni ekki um bólusetningar.

Fréttablaðið skýrir frá þessu í dag. „Atvinnurekandi hefur stjórnunar vald yfir starfsmönnum sínum, skipunarvald og þeim ber að hlýða“ er haft eftir Láru sem bætti við að það þurfi að hafa í huga að nú séu fordæmalausir tímar. Hún sagði jafnframt að ef atvinnurekandi óski eftir að starfsmaður fari í skimun áður en hann mætir til vinnu beri honum að standa straum af þeim kostnaði sem falli til vegna þess, þar með talin laun.

Hún sagði það sitt mat að erfitt sé fyrir starfsmann að halda því fram að atvinnurekandi sé að fara út fyrir valdsvið sitt ef hann skikkar viðkomandi í skimun. „Ég myndi halda að starfsmaður sem telur að atvinnurekandi fari þarna út fyrir valdsvið sitt að einhverju leyti, hann sé bara ekkert í mjög góðum málum. Atvinnurekandi geti óskað eftir þessu og fólk verði bara að sæta því enda sé þetta ekki langt út fyrir það sem skynsemi mælir með,“ sagði hún. Hún sagði öðru máli gegna um bólusetningu. „Ég tel að bólusetning sé svo sterkt inngrip að atvinnurekandi geti ekki skyldað starfsmann til slíks gegn vilja starfsmannsins. Vinnuréttarskyldur geti ekki náð svo langt. Atvinnurekandi þarf hins vegar ekki að hafa óbólusettan mann í vinnu og getur sagt honum upp starfi,“ sagði hún.