Héraðssaksóknari hefur ákært konu fyrir að hafa tálmað barnsföður sinn, en þau fóru með sameiginlegt forræði yfir börnunum sínum tveimur.
Í ákærunni segir að konan hafi framið sifskaparbrot, með því að hafa tekið börnin án leyfis mannsins og haldið þeim frá honum í um tvö ár, frá 12. júní 2019 til 3. júní 2021. Fram kemur að börnin hafi verið með skráð lögheimili heima hjá föður sínum.
Er konan ákærð fyrir brot gegn tálmunarákvæði hegningarlaga, en þar segir: „Hver sem sviptir foreldra eða aðra rétta aðila valdi eða umsjá yfir barni, sem ósjálfráða er fyrir æsku sakir, eða stuðlar að því, að það komi sér undan slíku valdi eða umsjá, skal sæta sektum eða fangelsi allt að 16 árum eða ævilangt.“
Héraðssaksóknari krefst þess í ákærunni að konunni verði gert að sæta refsingu og greiðslu alls sakarkostnaðar. Þá krefst faðirinn fyrir hönd ólögráða barna sinna að móðir barnanna greiði hvoru barni 1,8 milljónir í bætur auk málskostnaðar og þóknunar réttargæslumanna.
