Norski bóluefnavísindamaðurinn Gunnveig Grødeland segir að efni, sem gera veiruna óvirka, í núverandi bóluefnum virki ekki eins vel gegn Deltaafbrigðinu og öðrum afbrigðum. Bóluefnin veita þó mjög góða vörn gegn alvarlegum veikindum og dauða eða rúmlega 90% vernd. TV2 skýrir frá þessu.
Pfizer hefur sótt um heimild til að gefa fólki þriðja skammtinn af bóluefni fyrirtækisins og BioNTech til að auka vörnina gegn veirunni. Grødeland sagði að óháð því hvort þriðji skammturinn verði gefinn þá myndi líkaminn vörn og muni eftir veirunni og með því sé byggð upp vörn gegn afbrigðum framtíðarinnar. En hún sagðist jafnframt viss um að fyrr eða síðar komi afbrigði fram á sjónarsviðið sem verði ónæmt fyrir bóluefnunum sem nú eru notuð.
„Á einhverjum tímapunkti gerist það. Veiran þróast stöðugt og stökkbreytist. Nú þegar eru rúmlega 10.000 afbrigði af henni og þetta mun halda áfram. Núverandi bóluefni veita góða vörn gegn núverandi afbrigðum,“ sagði hún.
Hún sagði að ekki þurfi að hafa áhyggjur þótt fram komi afbrigði sem er ónæmt fyrir bóluefnum. „Ef við verðum búin að ná upp hjarðónæmi þá mun það veita vernd gegn verri afbrigðum en Delta. Það er því ástæða til að vona að óháð því hvað gerist að þá munum við hafa grundvallarvernd í framtíðinni,“ sagði hún.
Hún sagðist telja að bólusetja þurfi fólk reglulega gegn COVID-19 í framtíðinni.
