Sérlagaður plokkfiskur og fiskibollur hafa fylgti búðinni í 30 ár
Fiskbúðin Sundlaugavegi 12 er ein elsta fiskbúðin á höfuðborgarsvæðinu en frá 1947 hefur verið fiskbúð í þessu húsnæði. Högni Snær Hauksson sér um rekstur búðarinnar á Sundlaugavegi og hefur starfað þar í sex ár. „Við erum með ferskan fisk daglega og mikið úrval af fiskréttum,“ segir Högni.
„Við leggjum mikið upp úr að bjóða aðeins upp á ferskt hráefni og mikið úrval,“ segir Högni. „Það er líka gaman að segja frá því að við búum til okkar eigin humarsúpu á staðnum, plokkfisk og fiskibollur. Þegar kemur að plokkfisknum og bollunum þá notum við uppskriftir sem eru frá 1986 og hafa fylgt Fiskbúðinni Sundlaugavegi síðan þá,“ bætir hann við. „Þar af leiðandi hefur myndast hefð sem við ætlum okkur að halda við,“ segir hann.
„Við bjóðum upp á fjölbreytta fiskrétti sem eru tilbúnir og þægilegir til eldunar,“ segir Högni. „Það ætti því að vera auðvelt fyrir alla að finna eitthvað við sitt hæfi. Auk þess er úrvalið af fiski yfir höfuð mjög gott hjá okkur. Sem dæmi má nefna reykta ýsu, gellur, kinnar, þorsk, keilu, steinbít, lax, bleikju og margt fleira,“ segir Högni.
„Þar sem það styttist í þorrann erum við komin með súra hvalinn ásamt hákarlinum, salt- og kryddsíldarflök og harðfiskinn til dæmis,“ segir Högni. „Það er vert að nefna að við bjóðum upp á súra hvalinn og hákarlinn allt árið um kring ásamt kæstri skötu,“ bætir hann við. Það er opið mánudag til fimmtudags frá kl. kl. 09.00 til 18.30, föstudaga kl. 09.00 til 18.00 og laugardaga frá kl. 11.00 til 14.00. Högni sér til þess að facebooksíða verslunarinnar er mjög virk og geta viðskiptavinir nálgast upplýsingar um ýmiss konar tilboð sem eru í gangi hverju sinni sem og um úrval fiskverslunarinnar.
