Ævintýri Kórdrengja hefur verið lygilegt síðustu ár. Þeir hafa spólað sig upp um þrjár deildir á jafnmörgum árum og eru nú í toppbaráttu í Lengjudeild karla, næstefstu deild. Þeir geta nú látið sig dreyma um sæti í efstu deild.

,,Það þarf að ræða það núna að Kórdrengir gætu, af fullri alvöru, farið upp og það væri náttúrulega ótrúleg saga, bara ótrúlegasta saga íslenska fótboltans ef þeir rúlla upp enn einni deildinni,“ sagði Hörður Snævar Jónsson, þáttastjórnandi markaþáttar Lengjudeildarinnar á Hringbraut, í nýjasta þættinum.

Hrafnkell Freyr Ágústsson, sérfræðingur þáttarins, telur að Kórdrengir muni eiga góða möguleika á að fara upp í Pepsi Max-deildina, styrki þeir sig í félagaskiptaglugganum sem er framundan.

,,Mér finnst þeir þurfa að bæta aðeins við sig í glugganum. Þeir eru að mínu mati með svona 15 leikmenn sem geta spilað á þessu leveli. Restin eru strákar sem hafa verið í neðri deildunum. Ef þeir gera góða hluti í glugganum þá geta þeir klárlega farið upp. Þessir gæjar, þeir þekkja ekkert annað en að vinna leiki og þegar þú ert með þetta ‘winning mentality’ þá er bara helvíti erfitt að ná af þér 3 stigum.“

Hér fyrir neðan má sjá umræðuna um Kórdrengi, sem og markaþátt Lengjudeildarinnar í heild sinni. Þar var farið yfir alla leiki 8. umferðar.