Frjálslyndi lýðræðisflokkurinn er að myndast undir stjórn Guðmundar Franklíns Jónssoðnar, hagfræðingi og fyrrum forsetaframbjóðanda. Tvö nöfn voru að bætast inn á lista flokksins í dag en uppstillingarnefnd flokksins skipaði þau Sigurlaugu Gísladóttur, verslunarmann í Norðvesturkjördæmi, og Guðlaug Hermannsson, framkvæmdastjóra í Suðvesturkjördæmi, sem oddvita  í sínum kjördæmum.

„Pólitíska skoðun mín snýst um lýðræði og jafnrétti með þátttöku allra án hamla né kvaða. Ísland á bjarta framtíð fyrir sér sem ég vil taka þátt í að skapa,“ segir Guðlaugur í fréttatilkynningu frá flokknum. Í tilkynningunni kemur fram að Guðlaugur hafi stofnað fyrirtæki árið 2004 sem hann rekur enn í dag. „Þetta fyrirtæki er í útflutningi á sæbjúgum til Kína síðan 2009. Áhugamál hans eru ferðalög um Ísland, knattspyrna og samvera með fjölskyldu sinni sem er mjög stór og efnileg,“ segir í tilkynningunni.

Sigurlaug, sem oftast er kölluð Silla, býr á Blönduósi áamt sonum sínum og eiginmanni, Reyni Sigurði Gunnlaugssyni. Silla og Reynir eiga og reka saman lítið kaffihús sem kallast Húnabúð. Þar eru einnig seld blóm og gjafavörur. „Þar eru allir velkomnir,“ segir í tilkynningu flokksins.

Nú er farin að koma mynd á það hvernig listar Frjálslynda lýðræðisflokksins munu lýta út í komandi Alþingiskosningum. Guðmundur Franklín mun skipa oddvitasæti flokksins í Reykjavík norður, Glúmur Baldvinsson, stjórnmálafræðingur, mun verða oddviti flokksins í Reykjavík suður. Þá mun Magnús Guðbergsson, öryrki, taka oddvitasætið í Suðurkjördæmi og Björgvin Egil Vídalín Arngrímsson, eftirlaunaþegi, er oddviti í Norðausturkjördæmi.