8-liða úrslit Mjólkurbikars kvenna kláruðust í kvöld með fjórum leikjum. Breiðablik, FH og Þróttur Reykjavík eru komin í undanúrslit.

Stórsigur Blika

Breiðablik tók á móti Aftureldingu og vann stórsigur.

Agla María Albertdóttir og Vigdís Edda Friðriksdóttir komu Blikum í 2-0 með mörkum með stuttu millibili eftir rúmlega stundarfjórðung.

Agla María var aftur á ferðinni með þriðja mark heimakvenna um miðjan seinni hálfleik. Birta Georgsdóttir og Þórdís Hrönn Sigfúsdóttir bættu svo við mörkum áður en leiknum lauk. Lokatölur 5-0.

Öruggt hjá FH í Árbænum

FH heimsótti Fylki og vann öruggan sigur.

Selma Dögg Björgvinsdóttir kom gestunum yfir rétt fyrir lok fyrri hálfleiks.

Brittney Lawrance bætti svo við marki á 65. mínútu. Kolbrún Tinna Eyjólfsdóttir fékk að líta rautt spjald þegar rúmar tíu mínútur lifðu leiks. Í kjölfarið kláraði FH leikinn með tveimur mörkum frá Sunnevu Hrönn Sigurvinsdóttur og Elínu Björgu Norðfjörð Símonardóttur.

Bryndís Arna Níelsdóttir klóraði í bakkann fyrir Fylki í lok leiks. Lokatölur 1-4.

Frábær seinni hálfleikur Þróttar

Þróttur vann mjög góðan sigur á Selfossi á útivelli.

Brenna Lovera kom heimakonum yfir á 13. mínútu. Það var eina mark fyrri hálfleiks.

Lorena Yvonne Baumann jafnaði fyrir Þrótt snemma í seinni hálfleik. Katherine Amanda Cousins kom þeim svo yfir á 63. mínútu.

Shaelan Grace Murison Brown skoraði þriðja mark gestanna þegar um stundarfjórðungur lifði leiks. Guðrún Ólafía Þorsteinsdóttir innsiglaði svo 1-4 sigur Þróttar í lok leiks.