Það gengur illa hjá Donald Trump, fyrrum Bandaríkjaforseta, að finna bókaforlag sem vill gefa endurminningar hans út. Forlögin eru sögð hikandi vegna fyrri samskipta þeirra við Trump og vegna þess hversu erfitt hann á með að segja satt. Þetta hlýtur að valda Trump gremju og ekki síður sú staðreynd að Mike Pence, sem var varaforseti hans, átti ekki í neinum vandræðum með að finna útgefanda að væntanlegri endurminningabók sinni. Það er síðan spurning hvernig það fer í Trump að tengdasonur hans, Jared Kushner,  hefur gert útgáfusamning um bók þar sem hann mun segja „sannleikann um það sem gerðist á bak við luktar dyr“ í forsetatíð Trump.

Um endurminningabók verður að ræða og hafa margir af því áhyggjur að Kushner muni eins og tengdafaðir hans eiga erfitt með að halda sig við sannleikann í skrifum sínum. Kushner hefur verið í miklum metum hjá Trump sem gerði hann að sérstökum sáttasemjara í deilum Ísraelsmanna og Palestínumanna.  „Ef hann getur þetta ekki, þá er enginn sem getur þetta,“ sagði Trump 2017 þegar hann tilkynnti um þetta verkefni Kushner. Það hlýtur því væntanlega að mati Trump að vera vonlaust verkefni að reyna að koma á varanlegum friði á milli deiluaðilanna fyrst Kushner tókst það ekki.

Kushner hefur gert samning við hina íhaldssömu bókaútgáfu Brookside Books um útgáfu endurminninga hans á næsta ári. „Bókin hans verður endanleg og ítarleg frásögn af stjórninni og sannleikanum um hvað gerðist á bak við luktar dyr,“ segir í tilkynningu frá Brookside Books.