Ef vitsmunaverur eru til utan jarðarinnar þá er ekki útilokað að þær hafi smíðað risastór sólarorkuver á braut um stjörnur, stundum nefnt Dyson-himinhvel. Dyson-himinhvel er byggt á kenningu Freeman Dyson frá því á sjöunda áratug síðustu aldar en hann taldi að hægt væri að finna líf utan jarðarinnar með því að leita að innrauðum geislum frá risastórum mannvirkjum á borð við slík sólarorkuver. Nú leita vísindamenn að risastórum byggingum á borð við þetta en standa frammi fyrir þeim vanda að þeir vita ekki hvernig slíkir hlutir líta út.

Ef vitsmunaverur utan jarðarinnar, ef þær eru á annað borð til, líkjast okkur mönnunum eitthvað þá kallar þróun samfélags þeirra á sífellt meiri orku. Af þeim sökum er talið að þær gætu byggt sólarorkuver á braut um stjörnur pláneta sinna til að anna orkuþörf sinni.

SETI (Search for Extraterrestrial Intelligence) hefur leitað að ummerkjum um líf utan jarðarinnar áratugum saman en aðeins smá hluti af þeirri leit hefur beinst að leit að byggingum. Aðaláherslan hefur verið á útvarpsmerki.

En stjörnufræðingar leita að slíkum ummerkjum og nú er unnið að nákvæmri kortlagningu til að reyna að finna stjörnur sem líklegt má teljast að búið sé að koma sólarorkuverum fyrir á braut um. Þessi vinna hefur nú þegar skilað því að nokkrar stjörnur eru taldar koma til greina og nú er verið að hugleiða af alvöru hvernig eigi að staðfesta að ef eitthvað risastórt er á braut um þær sé það gert af vitsmunaverum.