Danska ríkisstjórnin tilkynnti í gær að Danir ætla að gefa Kenía 358.000 skammta af bóluefni AstraZeneca gegn kórónuveirunni. Danir eiga um 500.000 skammta af bóluefninu á lager og nálgast þeir síðasta notkunardag. Í samvinnu við UNICEF verða 358.000 skammtar sendir til Kenía. Ekki hefur verið gefið upp hvað verður gert við þá um 140.000 skammta sem eftir eru og eru komnir nærri síðasta notkunardegi.

Danir gáfu íbúum í Slésvík-Holtsetalandi í Þýskalandi nýlega tæplega 60.000 skammta af bóluefni AstraZeneca.

Bóluefni AstraZeneca er ekki notað við almennar bólusetningar gegn COVID-19 í Danmörku en fólki stendur til boða að láta bólusetja sig með efninu af fúsum og frjálsum vilja. Það sama á við um bóluefnið frá Johnson & Johnson. Ástæðan fyrir þessu er að dönsk heilbrigðisyfirvöld telja ekki réttlætanlegt að nota þessi tvö bóluefni vegna hættunnar á blóðtöppum af þeirra völdum og segja að ávinningur af notkun þeirra sé ekki nægilega mikill til að réttlæta notkun þeirra þar sem Danir hafi góða stjórn á faraldrinum.

Flemming Møller Mortensen, ráðherra þróunarmála, sagði í gær að samningurinn við Kenía geri landinu kleift að bólusetja enn fleiri gegn COVID-19. Löndin hafa lengi átt í nánu samstarfi og nú þurfi Kenía á bóluefnum að halda.