Aron Einar Gunnarsson fyrirliði Íslands verður klár í slaginn gegn Færeyjum á fimmtudag, hann fór meiddur af velli í tapi gegn Mexíkó á laugardag.

Aron virtist þar meiða sig í rifbeinum og missa andann um stutta stund. „Aron æfði með okkur í dag, nánast alla æfinguna. Hann verður klár í heila æfingu á morgun, þetta lítur mjög vel út,“ sagði Arnar Þór Viðarsson á fréttamannafundi í dag.

Arnar valdi í gær 24 manna hóp fyrir leikina gegn Færeyjum og Póllandi. Fyrir verkefnið átti ekki að taka leikmenn úr deildinni hér heima með en breyting varð á. FJórir af þeim fara í verkefnið. „Mjög líklega verður þetta hópurinn í leikina tvo, það gætu orðið breytingar. Við erum 24 samtals og við vonum bara að allir komi heilir úr Færeyja leiknum. Spurningin er bara að klára öll þau mál er varðar íslensku deildina.“

„Ef það leysist þá býst ég ekki við miklum breytingum. Það gæti verið erfitt að fresta leikjum út af verkefni í Evrópukeppni síðar í sumar. Það er í höndum KSÍ núna.“

Breiðablik, KA, FH og Keflavík eiga fulltrúa í sínu liði en liðin eiga öll að leika á mánudag. Birkir Már Sævarsson fer ekki til Færeyja vegna þess að dagskrá Vals er þétt næstu vikur.

„Dagskrá Vals er stífari en hjá öðrum. Það er ómögulegt að koma öllum þeim leikjum sem búist er við hjá Val, það er helsta ástæðan. Við hefðum viljað hafa markaskorarann hjá okkur,“ sagði Arnar en Birkir skoraði mark Íslands gegn Mexíkó.