Héraðssaksóknari hefur gefið út ákæru vegna alvarlegrar nauðgunar aðfaranótt mánudagsins 7. ágúst 2017. Málið er höfðað fyrir Héraðsdómi Suðurlands og verður rekið í dómsal dómstólsins í Vestmannaeyjum.

Rétt er að vara við atvikalýsingum sem fram koma hér að neðan.

Samkvæmt atvikalýsingu í ákærunni er um einkar hrottalegt brot að ræða. Maðurinn er sagður hafa haldið 15 ára gamalli stelpu niðri, klætt hana úr fötunum og haft við hana samræði og endaþarmsmök án hennar samþykkis. Er ákærði jafnframt sagður hafa rifið í hár konunnar og klórað bak hennar til blóðs og ekki látið af háttseminni þrátt fyrir að brotaþoli hafi tjáð árásarmanni að hún vildi fara. Þá er maðurinn sagður hafa nýtt sér yfirburðastöðu gagnvart stúlkunni vegna aflsmunar og að hún hafi verið stödd ein með honum fjarri öðrum.

Átta kynferðisbrot voru tilkynnt þessa verslunarmannahelgi, þar af sjö á útihátíðum og fjögur á Þjóðhátíð í Vestmannaeyjum. Tvö þeirra gerðust á tjaldsvæðinu í Herjólfsdal og annað í heimahúsi. Ekkert kom fram um hvar fjórða kynferðisbrotið sem tilkynnt var mun hafa átt sér stað.

Konan krefst þriggja milljóna í miskabætur auk málskostnaðar. Saksóknari krefst þess að maðurinn verði dæmdur til refsinga og greiðslu sakarkostnaðs. Verði maðurinn fundinn sekur á hann yfir höfði sér allt að 16 ára fangelsi.

Þinghald í málinu er lokað.