Þrír leikir fóru fram í 7. umferð Pepsi-Max deildar karla í kvöld. KR tók á móti ÍA, Leiknir sótti HK heim og Stjarnan mætti í Lautina.
KR byrjaði leikinn af krafti og var komið í 2-0 eftir 13 mínútur. Óskar Örn Hauksson og Kjartan Henry Finnbogason skoruðu mörkin. KR-ingar héldu áfram að sækja og sundurspiluðu ÍA. Skagamenn vöknuðu til leiks undir lok fyrri hálfleiks og fóru að sækja en náðu ekki að koma boltanum inn.
ÍA minnkaði muninn strax í byrjun seinni hálfleiks þegar Ísak Snær Þorvalsdsson skoraði frábært mark. Seinni hálfleikur var mun jafnari á milli liðanna en ÍA ívið sterkari. Óskar Örn kom KR-ingum í 3-1 eftir slæm mistök frá Dino í markinu. Það reyndist lokamark leiksins og KR sótti þrjú mikilvæg stig á heimavelli.
KR 3 – 1 ÍA
1-0 Óskar Örn Hauksson (´7)
2-0 Kjartan Henry Finnbogason (´13)
2-1 Ísak Snær Þorvaldsson (´46)
3-1 Óskar Örn Hauksson (´76)
Leiknir byrjaði leikinn af krafti en náði ekki að koma knettinum í netið. HK-ingar tóku yfir eftir því sem líða tók á leikinn og voru komnir 2-0 yfir í hálfleik með mörkum frá Jóni Arnari og Birni Snæ. Þá fékk Stefan Alexander Ljubicic tækifæri til að auka forystuna á 42. mínútu þegar HK fékk víti en hann lét Smit verja frá sér.
Sævar Atli minnkaði muninn fyrir Leikni um miðjan seinni hálfleik og þar við sat. HK-ingar tryggðu sér því þrjú mikilvæg stig í botnbaráttunni.
HK 2 – 1 Leiknir
1-0 Jón Arnar Barðdal (´32)
2-0 Birnir Snær Ingason (´38)
2-1 Sævar Atli Magnússon (´69)
Magnus Anbo kom Stjörnunni yfir um miðjan fyrri hálfleik með skalla eftir aukaspyrnu. Undir lok hálfleiksins fékk Emil Atlason beint rautt spjald fyrir brot á Arnóri Gauta og Stjörnumenn spiluðu því manni færri allan seinni hálfleikinn.
Fylkir sótti stíft í seinni hálfleik og uppskáru mark á 80. mínútu þegar Djair kom boltanum í netið. Ekki komu fleiri mörk í leikinn og jafntefli niðurstaðan í leiknum.
Fylkir 1 – 1 Stjarnan
0-1 Magnus Anbo (´24)
1-1 Djair Parfitt-Williams
