Liverpool hefur staðfest kaup sín á Ibrahima Konate varnarmanni RB Leipzig. Gerir hann langtíma samning við félagið.

Það eina sem vantar er að Konate sem er frá Frakklandi fái atvinnuleyfi á Englandi. „Ég er virkilega stoltur af því að ganga í raðir Liverpool,“ sagði Konate.

„Þetta er spennandi skref fyrir mig og fjölskyldu mína. Ég er spenntur fyrir því að hitta nýja liðsfélaga mína.“

Konate fagnaði í vikunni 22 ára afmæli sínu en Liverpool þarf að borga 41,5 milljón evra fyrir varnarmanninn, slík klásúla er í samningi hans við Leipzig.

Konate er franskur varnarmaður en honum er ætlað að mynda öflugt par með Virgil van Dijk varnarmanni félagsins. Van Dijk er að jafna sig eftir meiðsli líkt og Joel Matip og Joe Gomez, erfitt hefur verið að treysta á Matip og Gomez síðustu ár vegna meiðsla.