Talið er að kórónuveiran hafi fyrst komið fram á sjónarsviðið í Wuhan og hefur þeirri kenningu verið varpað fram að hún hafi sloppið út frá rannsóknarstofunni sem Daszak starfaði á við rannsóknir á kórónuveirum. Samkvæmt gögnum sem miðillinn Us Right To Know hefur undir höndum þá hefur Daszak verið duglegur við að reyna að beina athygli umheimsins frá þeim rannsóknum sem fóru fram á rannsóknarstofunni mánuðina áður en faraldurinn braust út. Meðal annars fékk hann aðra vísindamenn til að skrifa undir lesandabréf þar sem þeir segja að útilokað sé að veiran hafi átt upptök sín á rannsóknarstofunni.
Umrætt lesandabréf var birt í hinu viðurkennda vísindariti The Lancet þann 19. febrúar 2020. Þar sögðu 27 vísindamenn, frá mörgum löndum, að útilokað væri að veiran hefði átt upptök sín í rannsóknarstofu, hún væri komin úr náttúrinni. Á þeim tímapunkti hafði engin rannsókn farið fram á upptökum veirunnar. Það var Peter Daszak sem stóð á bak við þetta bréf og samdi það. Hann sendi það síðan til fjölda rannsóknarstofnana og hvatti vísindamenn til að skrifa undir það og lét það líta þannig út að ekki var að sjá að það kæmi í raun og veru frá EchoHealth Alliance samtökum hans.
Alþjóðlegir fjölmiðlar hafa fjallað um hlutverk Daszak á rannsóknarstofunni í Wuhan en þar vann hann að tilraunum með að erfðabreyta kórónuveirum árið 2019 og að smita frumur úr fólki með slíkum veirum.
Hann fór síðan með rannsóknarhópi WHO til Wuhan í janúar á þessu ári en hópurinn komst að þeirri niðurstöðu að „mjög ólíklegt væri að veiran hafi átt upptök sín í rannsóknarstofunni“.
Rétt er að hafa í huga að enn er ekki vitað með vissu hvar veiran átti upptök en að undanförnu hafa þær raddir orðið háværari sem krefjast ítarlegrar rannsóknar á uppruna hennar og hvort það geti verið að hún hafi sloppið út frá rannsóknarstofunni í Wuhan. Kenning WHO er að veiran hafi líklega borist úr leðurblökum í dýr og þaðan í fólk.
