Valur tók í kvöld á móti Breiðablik í 5. umferð Pepsi Max-deildar kvenna. Mikil spenna var fyrir leiknum enda hafa þessi tvö lið verið í sérflokki í deildinni síðustu ár. Leiknum lauk með ótrúlegum 3-7 sigri BLika.

Valur byrjaði leikinn af krafti fyrstu mínúturnar, komust í hörku færi strax í fyrstu sókn. Sísí Lára kom Val yfir eftir aðeins 6. mínútur úr hornspyrnu.

Þá kviknaði heldur betur á Blikaliðinu og þær yfirspiluðu Val út fyrri hálfleikinn. Kristín Dís jafnaði eftir hornspyrnu á 11. mínútu og Tiffany McCarthy kom Blikum yfir aðeins fjórum mínútum síðar.
Fjórum mínútum síðar skoraði nýi leikmaður Blika, Taylor Marie Ziemer, frábært mark eftir hörkuskot fyrir utan teig.
Mary Alice lenti í því óláni að skora sjálfsmark á 31. mínútu eftir góða sókn sem Áslaug Munda bjó til. Breiðablik var því 1-4 yfir í hálfleik.

Flestir bjuggust við því að Valsstelpur kæmu brjálaðar í seinni hálfleikinn en það voru Blikar sem héldu áfram að sækja. Agla María skoraði fimmta markið á 51. mínútu, Tiffany bætti við því sjötta níu mínútum síðar. Karitas Tómasdóttir skoraði svo sjöunda mark Blika á 65. mínútu.

Elísa Viðarsdóttir skoraði mark á 73. mínútu úr fyrirgjöf sem fór yfir Telmu í markinu. Elín Metta skoraði svo stórkostlegt mark og sitt fyrsta í sumar nokkrum mínútum síðar. Valur náði ekki lengra en það og ótrúlegur 3-7 sigur Blika staðreynd.

Blikar komast þá í 2. sætið með 12 stig og Valur situr í 3. sæti með 10 stig.

Valur 3 – 7 Breiðablik
1-0 Sigríður Lára Gunnarsdóttir (´6)
1-1 Kristín Dís Árnadóttir (´11)
1-2 Tiffany Janea McCarty (´15)
1-3 Taylor Marie Ziemer (´19)
1-4 Mary Alice Vignola sjálfsmark (´31)
1-5 Agla María Albertsdóttir (´51)
1-6 Tiffany Janea McCarty (´60)
1-7 Karitas Tómasdóttir (´65)
2-7 Elísa Viðarsdóttir (´73)
3-7 Elín Metta Jenssen (´80)