The Independent skýrir frá þessu.
Talið er að ein helsta ástæðan fyrir þessu séu hinar umfangsmiklu og hörðu viðskiptaþvinganir sem Bandaríkin beita gegn Íran. Ástæðan fyrir þvingununum er kjarnorkuáætlun Írana og stuðningur þeirra við herskáar sveitir og hryðjuverkasamtök í Miðausturlöndum.
Viðskiptaþvinganirnar koma mjög illa niður á olíuiðnaði landsins, bönkum og skipaútgerð. Á síðasta áratug hafa tekjurnar af olíuvinnslu dregist saman um 70% og það hefur valdið efnahagssamdrætti, atvinnuleysi og almennri óánægju meðal landsmanna sem hafa hvað eftir annað mótmælt klerkastjórninni sem stýrir landinu harðri hendi.
En gröftur eftir Bitcoin hefur komið sér vel fyrir Írana að sögn Elliptic greiningarfyrirtækisins. Fyrirtækið gerði rannsókn á greftri eftir Bitcoin og er hún byggð á gögnum frá þeim sem grafa eftir rafmyntinni og orkunotkun hjá ríkisorkufyrirtækjum.
Það krefst mikillar orku að grafa eftir rafmynt og það setur mörgum hömlur en í Íran er það ekki vandamál því landið nær ekki að selja alla þá olíu sem það vinnur og aðeins sáralítið af náttúrugasi. Það er því af nægri olíu og gasi að taka til rafmagnsframleiðslu og því hafa mörg gagnaver, þar sem grafið er eftir Bitcoin, skotið upp kolli víða um landið. Með þessu koma Íranar olíunni og gasinu í verð án þess að hægt sé að fylgjast með því. Vinnslan á Bitcoin fjármagnar síðan innflutning á vörum sem annars eru undirlagðar viðskiptaþvingunum.
En þetta hefur einnig sínar dökku hliðar því raforkukerfi landsins ræður varla við álagið og því hafa kínversku fyrirtækin RHY og Lubian komið að málum, bæði með fjármagn og þekkingu.
