Fjölmiðlamaðurinn Egill Helgason var ekki ánægður með úrslit Eurovision-söngvakeppninnar á laugardaginn og segir það fáránlegt að rokkband stigi á svið í keppninni með hljóðfærin ótengt.

„Um ítalska lagið var það sagt að það myndi venjast eins og mygla í baðherbergi. Sviss var með besta lagið,“ skrifaði Egill í færslu á Facebook í kjölfar keppninnar.

Skrifaði hann þar einnig í athugasemd að hans mat sé það að ekki verði sigurlagið áberandi í framtíðinni.

„Mun aldrei heyrast framar“

Hann segir það versta við keppnina að ekki mega spila á hljóðfæri.

„Það sem er agalegt við Evróvisjón er að þar má ekki spila á hljóðfæri. Meira aað segja Ítalirnir sem eru með gítar, bassa og trommur á sviðinu spila ekki. Það mega ekki sjást nein mistök. Playback er allsráðandi. Af þessu hlýst ákveðin gelding. Vantar einhvern veginn allan fíling í flutninginn. Leikræn tilþrif verða ofleikur.“

Hann segir að framan af í keppninni hafi tónlistin verið spiluð í beinni útsendingu.

„Svo hættu þeir því. Bara metnaðarleysi. Það er fáránlegt að vera með rokkband ás viði sem ekki spilar. Gengur kannski í tónlist sem kemur mestanpart úr tölvu.“

Hljómsveitin Maneskin sem sigraði keppnina sagði að keppninni lokinni að rokkið muni aldrei deyja. Egill veit ekki með þá yfirlýsingu.

„Rock’n’roll will never die, sögðu þau. Læðist samt að manni sá grunur eftir kvöldið að það sé í öndunarvél.“