Júróvisjón-æði er hlaupið í alla þjóðina og er engin undanskilinn, ekki einu sinni Sigmundur Davíð. Sigmundur hefur ekki farið leynt með andúð sína á Ríkisútvarpinu í gegnum tíðina. Síðast þegar hann skrifaði um sjónvarpsefni á RUV passaði meira að segja hann að taka fram að hann hefði verið „gestkomandi á heimili sem hefur aðgang að RUV.“ Júróvisjón áhugamenn landsins geta nú fagnað, því Sigmundur Davíð er genginn í þeirra raðir. Hann tilkynnir þetta á Facebook síðu sinni nú rétt í þessu.

„Ég held þetta ekki út lengur. Hér með aflétti ég þriðja Eurovision banninu,“ skrifaði Sigmundur. „Fyrst setti ég keppnina í bann 1990 eftir að fáránlega lélegt lag um Evrópubandalagið og Maastricht sáttmálann vann keppnina. Engin tók eftir banninu.“ Það þarf auðvitað ekki að hafa mörg orð um hvað Sigmundi þykir um Evrópusambandið.

„Það hafði engin áhrif og Draumur um Nínu fékk ekki sanngjarna niðurstöðu árið eftir,“ skrifar hann áfram. „Síðast hætti ég að fylgjast með Eurovision þegar Ísrael vann 2018 (ekki vegna þess að það var Ísrael heldur vegna þess að lagið var hræðilegt). Nú stenst ég ekki freistinguna. Áfram Ísland!“

Eins og allir eiga að vita hófust herlegheitin nú klukkan 19:00, og ef svo ólíklega fer að Sigmundi snúist hugur á síðustu stundu er vert að benda á að Stöð 2 sýnir hina tíu ára gömlu kvikmynd Johnny English Reborn kl 19:20. Hún er með 6.3 í einkunn á IMDB. Sjónvarp Símans sýnir þá ástralska þáttinn The Block. N4 sendir í loftið þáttinn „Þegar,“ um lögfræðinginn og fyrrverandi flugmálastjórann Pétur Einarsson. Þjóðlegi þátturinn Heima er bezt er svo á dagskrá Hringbrautar. Það er því úr nægu að velja fyrir þá sem ekki vilja horfa á Júróvisjón með okkur hinum, þó það verði sjálfsagt ekki margir.

Framlag Íslands, Daði Freyr og Gagnamagnið verður spilað af upptöku vegna Covid smits eins meðlims bandsins og verður upptakan sú sama og kom Íslandi áfram í undankeppninni á fimmtudag. Ísland er tólfta atriðið „á svið,“ en á undan okkur er Sviss, sem spáð er góðu gengi í keppninni.

„Áfram Ísland,“ segir Sigmundur Davíð. Undir það tekur helgarvakt DV.