Handtakan sem fram fór í miðbæ Reykjavíkur í upphafi mánaðarins átti sér stað á Röntgen, samkvæmt heimildum DV. Var þar 28 ára gamall karlmaður leiddur út af lögreglu vegna gruns um kynferðisbrot. Fréttablaðið greindi fyrst frá handtökunni. Manninum var sleppt að skýrslutöku lokinni.
Í samtali við blaðamann DV staðfesti Ævar Pálmi Pálmason, aðstoðaryfirlögregluþjónn og yfirmaður kynferðisbrotadeildar lögreglunnar á höfuðborgarsvæðinu, að handtakan hafi farið fram en gat ekki greint frá öðrum hliðum málsins að svo stöddu. Sem fyrr sagði herma heimildir DV að handtakan hafi átt sér stað á Röntgen við Hverfisgötu seinni part dags og að fjöldi vitna hafi orðið að henni.
Ævar gat hvorki tjáð sig um hver staðan væri á rannsókn málsins né um önnur málsatvik. Samkvæmt heimildum DV mun brotið hafa átt sér stað sama dag og handtakan fór fram. Afar sjaldgæft er að grunaðir einstaklingar séu „sóttir“ með þessum hætti. Algengara er að þeir séu boðaðir í skýrslutöku með hefðbundnum hætti. Í samtali við Fréttablaðið sagði Ævar að slíkt væri einkum gert þegar ekki væri langt liðið frá broti.
Veitingastaðurinn Röntgen var í fréttum fyrr á árinu þegar ung kona var bitin í andlitið af Rottweiler hundi þar inni.
