Teller, hinn heimskunni töframaður og annar helmingur töfratvíeykisins Penn&Teller, mun funda med félögum í Hinu íslenska töframannagildi annað kvöld, miðvikudaginn 19. maí, en vegna heimsfaraldursins hafa fundir gildisins verið á Zoom frá því í janúar síðastliðinn.

Teller á að baki rúmlega 40 ára feril sem töframaður og er talinn einn færasti listamaður heims á sínu sviði í dag. Hann býr yfir ótrúlegri tækni, ásamt næmri tilfinningu fyrir framsetningu töfrabragða sinna sem eru í senn leikræn og ljóðræn.

Penn og Teller eiga langan samstarfsferil að baki og vöktu mikil viðbrögð þegar þeir tóku að afhjúpa töfrabrögðin um leið og þeir sýndu þau, þó á þann hátt að í raun afhjúpuðu þeir ekki neitt.

Þeir stýra hinum feikivinsæla sjónvarpsþætti Fool Us, en Teller er maðurinn sem aldrei segir orð, það er, hinn þögli partur tvieykisins.

Undanfarna mánuði hafa fjölmargir stórlaxar í töfraheiminum mætt til leiks á netfundum HÍT og haldið fyrirlestra og töfrakennslu, margir þeirra heimsmeistarar í töfrabrögðum, eins og Shawn Farquhar og Jay Sankey frá Kanada,  og Bandaríkjamennirnir Kenton Knepper, Howard Hamburg, Max Maven og Gregory Wilson. Í lok maí mætir svo goðsögnin Lance Burton á fund með íslensku töframönnunum, en hann hefur haldið yfir 15.000 töfrasýningar í Las Vegas fyrir yfir fimm milljón manns, en sýningar hans voru haldnar á 31. árs tímabili.

Hið íslenska töframannagildi er fyrir alla sem  hafa áhuga á töfrum og töfrabrögðum, en það stendur meðal annars fyrir námskeiðum og fyrirlestrum í töfrabrögðum fyrir félagsmenn. Nánari upplýsingar á vefsíðu félagsins www.toframenn.is