Ole Gunnar Solskjaer hefur viðurkennt að mótmæli stuðningsmanna Manchester United gegn Glazer fjölskyldunni hafi haft áhrif á spilamennsku liðsins í síðustu leikjum.

United spilaði fjóra leiki á aðeins átta dögum eftir að leik liðsins gegn Liverpool var frestað vegna mótmæla stuðningsmanna.

Þegar frestaði leikurinn fór fram héldu mótmælin áfram og þýddi það að leikmenn United þurftu að mæta á völlin sjö tímum áður en leikurinn byrjaði sem hafði áhrif á undirbúning þeirra. Manchester United tapaði leiknum 2-4 gegn Liverpool og hafði tapað gegn Leicester aðeins tveimur dögum fyrr.

„Ég vildi nú ekki nota það sem afsökun á því að við töpuðum þessum tveimur leikjum, en það er klárlega á bakvið þessar frammistöður“, sagði Solskjaer

„Það er ómögulegt að mæta tilbúinn í þetta og spila á háu tempói með svona marga leiki á stuttum tíma. Við náðum ekki að jafna okkur á milli og höfðum heldur ekki tíma til að undirbúa taktíkina.“

„Enginn af strákunum kvartaði sem ég er ánægður með og mér fannst frábært hvernig þeir tóku á þessu, en þetta hafði áhrif á þá.“

Aðdáendur mæta aftur á völlinn hjá liðinu næsta fimmtudag, en það er síðasti heimaleikur liðsins í deildinni þetta tímabilið og mega tíu þúsund áhorfendur fylgjast með.