DV fjallaði á dögunum um ósætti sælgætisgerðarinnar Góu og Nóa Síríus en nýlega hóf Nói Síríus sölu á svokölluðum Tromp hvellum. Það væri varla í frásögur færandi nema að varan er nánast sú sama og Appolo lakkrís bitarnir sem Góa hóf sölu á í fyrra.

Atli Einarsson, viðskiptastjóri Góu, sagði í samtali við DV að „þetta væri bara lélegt“ af Nóa Síríus en Appolo lakkrís bitarnir seldust mjög vel hjá Góu í fyrrasumar.

Auglýsingar frá Nóa Síríus vegna Tromp hvellanna hafa prýtt strætóskýli seinustu daga og í dag birtu bæði fyrirtæki heilsíðuauglýsingu í Fréttablaðinu. Góa hefur einnig birt sínar auglýsingar á hinum ýmsu vefsíðum þar sem talið er niður dagana þangað til Appolo lakkrís bitarnir koma í sölu.

Umræður hafa skapast í Facebook-hópum á borð við Nammitips, en þar eru skiptar skoðanir um vörurnar tvær. Sumir segja Tromp hvellina vera betri en flestir segja lakkrísinn í þeim einfaldlega vondan og því ekki gott að borða hvellina. Þá eru skoðanir á súkkulaði sælgætisgerðanna öðruvísi en flestir eru sammála um að súkkulaði Nóa Síríus sé betra en súkkulaði Góu. Miðað við almenningsálit ættu gerðirnar að sameinast með súkkulaði frá Nóa Síríus og lakkrís frá Góu til að framleiða hið fullkomna nammi.

Norskir aðilar keyptu 80% hlut í Nóa Síríus á dögunum og skrifaði Gísli Kristjánsson pistil um þessa nýju eigendur fyrir Spegilinn á RÚV. Fyrir áttu þeir 20% hlut í fyrirtækinu og eiga Norðmenn því allt fyrirtækið í dag.