Benedikt Bóas Hinriksson, blaðamaður á Fréttablaðinu, fór yfir íslenska fótboltann í sjónvarpsþætti okkar á Hringbraut í gær. Rætt var um stöðuna í Garðabæ og hvað Stjarnan gerir nú þegar Rúnar Páll Sigmundsson er horfinn á braut.

Benedikt fór einnig ofan í vandræði Breiðabliks, eftir að hafa verið spáð titlinum hefur Breiðablik byrjað mótið illa. Liðið fékk skell gegn KR í fyrstu umferð og rétt bjargaði svo stigi gegn Leikni um liðna helgi.

„Óskar er of góður þjálfari, hann er búinn að drilla liðið sitt of vel og of mikið. Þetta er vélmenna-fótbolti, þeir vilja láta hverja einustu sókn líta vel út á blaði eða í leikgreinginu. Það er ekkert frjálsræði, það er engin sköpunargleði,“ sagði Benedikt um vanda Breiðabliks.

Djöfull ertu heimskur:

Benedikt ræddi einnig dómgæsluna í upphafi móts og snerti á nokkrum atriðum, eitt af þeim atriðum var rauða spjaldið sem Haukur Páll Sigurðsson fyrirliði Vals fékk gegn FH á sunnudag.

„Mér fannst skrýtið spjaldið á Hauk Pál, það er verið að refsa Hauki fyrir eitthvað sem Jónatan gerir ólöglega. Ólöglegi hluturinn er verðlaunaður með hinu,“ sagði Benedikt en Haukur Páll sparkaði í Jónatan.

Benedikt er einnig efins um rautt spjald sem Unnar Steinn Ingvarsson leikmaður Fylkis fékk í fyrstu umferð gegn FH. Erlendur Eiríksson var dómari leiksins.

„Fyrra gula spjaldið á Unnar Steinn í fyrstu umferð gegn FH, ég gat ekki séð að það væri spjald. Í seinna spjaldinu þá held ég að Erlendur hafi hugsað með sér: „Djöfull ertu heimskur“.“