Maguire fór meiddur af velli gegn Aston Villa á sunnudag í ensku úrvalsdeildinni en um var að ræða fyrstu mínúturnar sem hann missti af í ensku úrvalsdeildinni frá því að hann gekk í raðir félagsins.

Maguire fór í myndatöku í dag og segir Solskjaer að hún hafi komið betur út en hann þorði að vona.

„Hann er búinn í öllum rannsóknum og góðu fréttirnar eru að það er ekkert brot,“ sagði Solskjaer fyrir leik Manchester United og Leicester.

„Þetta er bara liðbandaskaði og við vonumst til þess að fá hann aftur fyrir úrslitaleikinn í Evrópudeildinni.“

Ljóst er að Maguire verður ekki með í lokaleikjum deildarinnar en vonir standa til um að hann verði með í úrslitaleik Evrópudeildarinnar 26. maí gegn Villareal.

Gareth Southgate er eflaust glaður með þessar fréttir en Maguire er einnig afar mikilvægur fyrir landslið Englendinga sem keppir á Evrópumótinu í sumar.