Atli Viðar Björnsson, goðsögn FH og sparkspekingur, segist finna til með Sölva Snæ Guðbjargarsyni í kjölfar þeirrar umræðu sem hefur skapast um hann eftir að Rúnar Páll Sigmundsson sagði af sér sem þjálfari Stjörnunnar. Samningsstaða leikmannsins er talin hafa haft áhrif á uppsögnina.
Stjórnarmenn í Stjörnunni eru sagðir hafa verið ósáttir með það að Sölvi hafi fengið að spila fyrsta leik Íslandsmótsins gegn Leikni um síðustu helgi án þess að vera búinn að skrifa undir nýjan samning. Leikmaðurinn hefur verið orðaður við Breiðablik. Málið var krufið í Pepsi Max Stúkunni á Stöð 2 Sport í gær.
,,Ég finn til með honum (Sölva). Mér finnst þetta með ólíkindum sorglegt mál,“ sagði Atli í útvarpsþættinum Fótbolta.net í gær. ,,Ef þetta er rétt, sem ég óttast að sé, að stjórnin hafi verið að skipa Rúnari að nota ekki Sölva, það finnst mér grafalvarlegt mál.“
Umræðan hefur verið á þann veg að afskiptasemi stjórnarinnar hafi verið kornið sem fyllti mælinn hjá Rúnari. Því hafi hann sagt upp.
,,Sölvi Snær er ekki að gera nokkurn skapaðan hlut rangt. Fyrir mér á það að gerast núna, hafi það ekki gerst, að stjórnarmenn Stjörnunnar hringi í Sölva og biðji hann afsökkunnar.“
Atli fordæmir vinnubrögðin. ,,Ef menn vilja standa fyrir þetta þá myndi ég nú helst kjósa að menn finndu sér eitthvað annað að gera.“