Íslendingum hefur nú verið boðið að kaupa skammta af hinu rússneska Spútnik V bóluefni fyrir 200 þúsund manns. RÚV greinir frá þessu. Þá segir að íslensk stjórnvöld skoði nú þann möguleika á að kaupa skammta fyrir 100 þúsund manns en með því skilyrði að stærstur hluti skammtanna verði kominn hingað til lands fyrir 2. júní og að bóluefnið verði þá komið með markaðsleyfi.

Russian Direct Investment Fund hefur sent íslenskum yfirvöldum yfirlýsingu þar sem fram kemur að vilji sé til staðar til að hefja samningaviðræður um kaup á bóluefninu. Þetta kemur fram í upplýsingum sem RÚV fékk frá heilbrigðisráðuneytinu. Var yfirlýsingin send eftir fund fulltrúa utanríkisráðuneytisins með fulltrúum framleiðanda og þróunaraðila bóluefnisins.

Verið er að vinna að viðbrögðum við yfirlýsingunni innan íslenska stjórnkerfisins. Lagt er til að keyptir verði skammtar fyrir 100 þúsund einstaklinga en rússar þyrftu þá að afhenda 75% af skömmtunum í síðasta lagi þann 2. júní. Samningarnir munu þó ekki ganga í gegn nema bóluefnið fái markaðsleyfi í Evrópu fyrir þann tíma.