Undanúrslit Evrópudeildarinnar fóru fram í gær. Á Emirates leikvanginum þurftu heimamenn sigur eftir að hafa tapað fyrri leiknum gegn Villarreal, 2-1, ytra.
Fyrri hálfleikur var bragðdaufur. Gestirnir voru virkilega þéttir til baka og gáfu fá færi á sér. Pierre-Emerick Aubameyang, fyrirliði Arsenal, komst næst því að skora í fyrri hálfleik. Þá fór skot hans utarlega í vítateig Villarreal í stöngina. Dani Parejo átti hættulegustu tilraun þeirra gulklæddu með skoti rétt yfir markið úr aukaspyrnu, rétt fyrir utan teig. Staðan í hálfleik var markalaus. Það var meiri kraftur í liði Arsenal í byrjun seinni hálfleiks. Nicolas Pepe átti skot rétt framhjá markinu á 47. mínútu og stuttu síðar fékk Emile Smith-Rowe gott færi eftir vandræðagang hjá Geronimo Rulli, markverði Villarreal. Skot Smith-Rowe fór þó framhjá markinu. Gerard Moreno fékk þá tækifæri til að skora fyrir gestina snemma í hálfleiknum en allt kom fyrir ekki.
Leikurinn átti svo eftir að róast aftur. Aubameyang átti skalla í stöng eftir fyrirgjöf frá Hector Bellerin þegar tíu mínútur lifðu leiks, allt kom fyrir ekki. Villarreal fer áfram eftir 2-1 sigur samanlagt.
Martin Keown fyrrum leikmaður Arsenal telur að starf Mikel Arteta sé ekki öruggt eftir þessi úrslit. „Það er rosaleg pressa á Arteta. Þetta er rosalega stórt starf, þetta er risastórt félag,“ sagði Keown.
„Þú verður að læra fljótt, ég er ekki að segja að hann verði ekki áfram stjóri en sú ákvörðun verður klárlega skoðuð í sumar.“
„Hann þarf að byrja næsta tímabil með látum ef hann ætlar að halda starfinu, hann er undir rosalegri pressu hnúna. Félagið þarf að taka stórar ákvarðanir á næstunni.“
