Heil umferð var spiluð í fyrstu umferð Lengjudeildar kvenna í kvöld. Nóg var um mörk í leikjunum fimm.
Haukar unnu Hafnarfjarðarslaginn
Haukar tóku á móti FH í stórleik umferðarinnar. Berglind Þrastardóttir kom Haukum yfir snemma leiks. Hildur Karítas Gunnarsdóttir tvöfaldaði svo forystuna með frábæru skoti fyrir utan teig. FH klóraði í bakkann í seinni hálfleik með marki úr víti.
Augnablik með sigur á KR
Svana Rún Hermannsdóttir kom KR yfir í Kópavogi eftir rúmar 10 mínútur af seinni hálfleik. Viktoría París Sabido jafnaði stuttu síðar áður en Harpa Helgadóttir kláraði leikinn svo fyrir Augnablik á 79. mínútu.
Grótta kom til baka á heimavelli gegn ÍA
Védís Agla Reynisdóttir kom Skagastúlkum yfir eftir rúman stundarfjórðung og var staðan í hálfleik 0-1. Eftir tæpan klukkutíma leik jafnaði Tinna Jónsdóttir fyrir Gróttu. María Lovísa Jónasdóttir skoraði svo sigurmark heimakvenna í lok leiks.
Kristín Erna með þrennu í markajafntefli í Víkinni
Kristín Erna Sigurlásdóttir kom Víkingum yfir strax á fjórðu mínútu gegn HK. Gestirnir jöfnuðu þó nokkrum mínútum síðar með marki frá Ragnheiði Köru Hólm Örnudóttur. Kristín skoraði aftur í byrjun seinni hálfleiks og kom heimastúlkum yfir. María Lena Ásgeirsdóttir svaraði þá strax hinum megin fyrir HK. Staðan orðin 2-2. Kristín gerði sér þá lítið fyrir og kom Víkingi aftur yfir strax tveimur mínútum síðar áður en Ragnheiður Kara gerði sitt annað mark aðeins nokkrum sekúndum síðar. Ótrúlegar mínútur! Lokatölur urðu 3-3.
Jafnt í Mosfellsbæ
Afturelding tók á móti Grindavík. Lokatölur urðu 2-2. Því miður vantar upplýsingar um markaskorara í leiknum að svo stöddu.
