Knattspyrnusamband Íslands hefur ákveðið að ganga til samninga við RÚV um útsendingarétt frá bikarkeppni KSÍ fyrir árin 2022 til og með 2026.

KSÍ og ÍTF óskuðu í síðasta mánuði eftir tilboðum í útsendingaréttindi tveggja efstu deilda Íslandsmóts karla og kvenna sem og Bikarkeppni beggja kynja. Fjölmargir aðilar, innlendir og erlendir, sýndu áhuga á þessum réttindum og ljóst er að íslensk knattspyrna er eftirsótt sjónvarpsefni. Önnur réttindi, s.s. streymisréttur, nafnaréttur og útsendingaréttur erlendis, fara í sambærilegt ferli í byrjun sumars og er ætlunin að ljúka samningum þar að lútandi í haust.

Guðni Bergsson formaður KSÍ: ”Við erum mjög ánægð með áhuga RÚV á þessari keppni og er það jákvætt skref að þessi elsta og virtasta bikarkeppni landsins verði aðgengileg í sjónvarpi allra landsmanna.”

Hilmar Björnsson íþróttastjóri RÚV: „Stefna RÚV er að sýna frá bikarkeppnum í hinu ýmsu íþróttagreinum og það er í fullu samræmi við þá stefnu að geta nú einnig boðið uppá bikarkeppni kvenna og karla í knattspyrnu. Bikarkeppi KSÍ á sér langa sögu á RÚV og verður virkilega spennandi að sýna aftur frá íslenskum fótbolta þar.“