Manchester City tryggði sér í kvöld sæti í úrslitaleik Meistaradeildar Evrópu eftir 2-0 sigur gegn PSG. Samanlagt sigraði City einvígið 4-1. Kyle Walker var kampakátur með sigurinn og sætið í úrslitaleiknum:

„Fyrir strák frá Sheffield þá er þetta það sem mann dreymir um. Nú er þetta búið að rætast, ég er svo glaður,“ sagði Kyle Walker við BT sport.

„Gegn svona góðum leikmönnum þurfa allir að standa sig, John, Ruben og Alex voru frábærir varnarlega. Við náðum að halda niðri hæfileikum þeirra. Þetta er liðsíþrótt, við fögnum allir mörkum. Fyrir okkur varnarmenn þá snýst þetta um að halda hreinu.“

„Við höfum verið stórkostlegir á tímabilinu.“

Leikmönnum City hefur lengi dreymt um að komast í úrslitaleikinn og hafa verið nálægt því síðustu ár en loksins tókst það.

„Á svona stórri stundu þá eru taugarnar þandar. Við þurfum að hafa stjórn á því. Við setjum pressu á okkur sjálfa. Við köstuðum þessu frá okkur á Anfield og gegn Tottenham. Á síðasta ári var þetta öðruvísi, það var aðeins einn leikur. Að ná loksins sigri bæði heima og úti sýnir hvað liðið er frábært.“