Lögreglumaður hlaut skurð í andliti er hann reyndi ásamt kollegum sínum að ná stjórn á mótmælunum sem áttu sér stað fyrir utan Old Trafford, heimavöll Manchester United í fyrradag.

Mótmælin urðu til þess að leik Manchester United og Liverpool í gær var frestað um óaákveðinn tíma.

Þúsundir mótmælenda söfnuðust saman fyrir utan Old Trafford til þess að mótmæla eignarhaldi Galzer-fjölskyldunnar á Manchester United. Hópur mótmælanda braut sér síðan leið inn á Old Trafford og einhver skemmdarverk voru unnin.

Lögreglan í Manchester hefur staðfest að lögreglumaður hafi hlotið skurð í andliti eftir að hafa fengið glerflösku í andlitið. Af myndum af dæma má lögreglumaðurinn teljast heppinn að glerbrot í flöskunni hafi ekki farið í auga hans.

„Okkar hugrakki samstarfsmaður fór til vinnu til að tryggja öryggi fólks í Manchester, hann varð fyrir árás. Hann er einfaldlega heppinn að hafa ekki misst sjónina, þetta er ekki rétt framkoma,“ sagði í yfirlýsingu lögreglunnar en maðurinn var illa slasaður.

„Lögreglufólk eru mæður, feður, eiginmenn, eiginkonur og makar. Þetta eru synir og dætur, þetta eru manneskjur sem eiga að geta farið heim til sín í heilu lagi eftir vaktina. Það á ekki að þurfa að fara á spítala.“

„Við þurfum styðja slasaðan samstarfsfélaga og munum gera það á meðan hann jafnar sig.“